Ekonomije – Gie jåarhkelïerehtimmien åvteste maaksa?

Lïerehtimmie byögkeles jåarhkeskuvlesne jïh learoesïeltesne lea namhtah Nöörjesne. Learohkh frijjeskuvline (privaate jåarhkeskuvlh) tjuerieh skuvlebeetnegh maeksedh.

Daah öörnegh leah faamosne gaajhkide learoehkidie:

• Trygkeme jïh digitaale learoevierhtieh jïh digitaale dalhketjh leah namhtah, dovne byögkeles jåarhkeskuvline jïh frijjeskuvline mej reaktah staatedåarjose.
• Jis skuvle sjïehteladta datne tjoerh pc:m nuhtjedh dovne skuvlesne jïh gåetesne, skuvle edtja dutnjien guedtije pc:m reebledh. Skuvle maahta krïevedh fïerhten jaapetje jïjtsemaaksoem pc:n åvteste.

Vuelielisnie maahtah vielie lohkedh ovmessie stipende- jïh dåarjoeöörnegi bïjre learoehkidie jåarhkeskuvlesne.

Sijjesne lanekassen.no vielie bïevnesh maaksoeåasaj bïjre gaavnh.

Dalhketjestipende

Gaajhkh learohkh jåarhkeskuvlesne noerereaktine maehtieh dalhketjestipendem åadtjodh Lånekasseste.

• Learohkh dalhketjestipendem åadtjoeh saaht man jïjnjem eejhtegh dïenesjieh.
• Dalhketjestipenden stoeredahke lea jearohke dehtie ööhpehtimmieprogrammeste learohke vaalta.

Lïerehtæjjah, learoekandidaath jïh praksiseprieviekandidaath eah dalhketjestipendem åadtjoeh, men maehtieh reaktam utnedh jeatjah stipendide.

Båarhteårrojestipende

Learohkh mah tjuerieh båarhte årrodh juktie skuvlem vaedtsedh maehtieh båarhteårrojestipendem åadtjodh Lånekasseste. Juktie daam stipendem åadtjodh tjuerieh aktem dejstie krïevenassijste illedh:

• Skuvle lea 40 km jallh vielie eejhtegehïejmeste. .
• Tjåenghkies feelemetïjje fïerhten biejjien lea golme tæjmoeh jallh vielie.
• Joekoen tsiehkieh persovneles jallh sosijaale karakteereste man åvteste learohke tjuara båarhte årrodh ööhpehtimmesne.
  

Stipende vadtasåvva daerpiesvoeten mietie lïerehtæjjide, learoekandidaatide jïh praksiseprieviekandidaatide. Man jïjnjem datne dïenesjh goh lïerehtæjja, baajnehte man stoerre båarhteårrojestipendem datne maahtah åadtjodh

Stipende jearohke sïjsebaalhkan mietie

Stipende mij lea jearohke sïjsebaalhkeste edtja dåarjojne årrodh jieliemassemaaksoeh maeksedh learoehkidie mah fuelhkijste båetieh viesjies ekonomijine. Jis learohke sæjhta stipendem ohtsedh mij lea jearohke sïjsebaalhkeste, dïhte tjuara kroessem bïejedh dïsse ohtsemisnie.

Jeatjah dåarjoeöörnegh learoehkidie

Learohkh, lïerehtæjjah jïh learoekandidaath jåarhkelïerehtimmesne maehtieh löönemen jïh jeatjah stipendi bïjre syökedh Lånekassesne. Sijjesne lanekassen.no vielie bïevnesh gååvnesieh maam datne maahtah stipendine jïh lööneminie åadtjodh.

Gåarede aaj gellie stipendh jïh legaath ohtsedh ööhpehtæmman, jåarhkeööhpehtæmman, kultuvrese jïh dotkemasse jïh sosijaale veahkan. Vuartesjh legathandboken.no, jallh gihtjh Legathåndboken mietie gærjagåetesne jallh gærjabovresne.