15 Ööhpehtimmieprogrammh dutnjien gellie nuepieh vedtieh

5 studijeryöjreden ööhpehtimmieprogrammh

Studijeryöjreden lïerehtimmie dutnjien guhte sïjhth jollebe ööhpehtimmiem vaeltedh, guktie vuesiehtimmien gaavhtan maahtah lohkehtæjjine, skïemtjesåjhterinie jallh advokaatine sjïdtedh.

• 5 studijeryöjreden programmh mej gaskem maahta veeljedh.
• Doh jeanatjommes faagh studijeryöjreden lïerehtimmesne leah sjïere «lohkemefaagh» goh nöörjen, matematihke, seabradahkefaage, histovrije, eatnemefaage jïh ammesgïelh.
• Lissine dov leah faagh dov ööhpehtimmieprogrammeste, vuesiehtimmien gaavhtan musihke, gaarsjelimmie, hammoedimmie jïh arkitektuvre jallh fysihke.
• Gosse illeme jïh eksamenem vaalteme golme jaepiej mænngan skuvlesne, datne studijemaahtoem åadtjoeh.
• Datne tjoerh studijemaahtoem utnedh juktie jollebe ööhpehtimmiem jïlleskuvlesne jïh universiteetesne syökedh.

Lohkh ööhpehtimmieprogrammi bïjre mej gaskem maahtah veeljedh:

• Gaarsjelimmiefaage
• Tjeahpoe, hammoedimmie jïh arkitektuvre
• Medijah jïh gaskesadteme
• Musihke, daanhtsoe jïh draama
• Studijespesialiseereme

10 barkoefaageles ööhpehtimmieprogrammh

Barkoefaageles lïerehtimmie lea dutnjien mij praktihkeles barkoem sæjhta, vuesiehtimmien gaavhtan elektrihkere, jurjiehtæjja jallh bietskiedæjja.

• 10 barkoefaageles ööhpehtimmieprogrammh mej gaskem maahta veeljedh.
• Dejnie jeanatjommes barkoefaagine lïerehtimmie vadtasåvva göökte jaepieh skuvlesne jïh göökte jaepieh sïeltesne.
• Lïerehtimmie sïeltesne gohtjesåvva learoetïjje. Learoetïjjen gåarede baalhkam åadtjodh.
• Gosse eksamenem illeme jïh vaalteme barkoefaageles lïerehtimmesne, barkoemaahtoem åadtjoeh.
• Barkoemaahtojne maahtah veeljedh barkoem ohtsedh jallh guhkiebasse ööhpehtimmiem vaeltedh faageskuvlesne.
• Dov aaj reakta lissiebigkemem sïejhme studijemaahtose vaeltedh (vuartesjh vuelielisnie).

Lohkh ööhpehtimmieprogrammi bïjre mej gaskem maahtah veeljedh:

• Bigkeme- jïh tseegkeldahketeknihke
• Elektro jïh daatateknologije
• Bietskiedæjja, plåamstere, interijööre jïh eksponeeremehammoe
• Vætnoe, hammoe jïh dorjeseevtiedimmie
• Healsoe- jïh byjjenimmiefaage
• Informasjovneteknologije jïh medijaproduksjovne
• Eatnemeåtnoe (nuepine studijeryöjreden Jåa3:ine)
• Restauraante- jïh beapmoefaage
• Doekeme, service jïh fealadasse
• Teknologije- jïh industrijefaage

Lissiebigkeme sïejhme studijemaahtose

Studijemaahtoem sïjhth mænngan eksamenem illeme jïh barkoelïerehtimmiem stååresjamme?

• Dov lea reakta lissie lïerehtimmiejaepiem åadtjodh, guktie maahtah studijemaahtoem åadtjodh.
• Maahtah lissiebigkemen bïjre syökedh sïejhme studijemaahtose mænngan 2 jaepieh vaadtseme barkoefaageles ööhpehtimmieprogrammesne, jallh mænngan datne leah barkoemaahtoem åådtjeme.
• Lissiebigkeme sïejhme studijemaahtose lea krïevije jïh teoretihkeles lïerehtimmie mij dorjesåvva skuvlesne.
• Datne studijemaahtoem åadtjoeh mænngan eksamenem illeme jïh lïerehtimmiem stååresjamme, jïh dan åvteste nuepiem åtnah jollebe ööhpehtimmiem jïlleskuvlesne jallh universiteetesne syökedh.

Maadthmaahtoe

• Maadthmaahtoe lea alternatijve dutnjien mah joekehts fåantoej gaavhtan dåeriesmoerh åtnah ellies lïerehtimmiem illedh.
• Datne maahtoevihtiestimmiem åadtjoeh mij vihteste datne bielieh lïerehtimmeste illeme.
• Dov lea nuepie dov ulmiem jarkelidh jïh abpe lïerehtimmiem tjïrrehtidh, guktie maahtah ellies barkoemaahtoem jallh studijemaahtoem åadtjodh.