Vierisgiela válljen

Studeremii ráhkkanahtti oahppoprográmmain dus galgá leat, eaŋgasgiela lassin, nubbi vierisgiella oktasašfágan. Dat ii guoskka dutnje, geas galgá leat oahpahus čuovvovaš oahppoplánaid mielde

• sámegiella 1. dahje 2. giellan
  
• suomagiella 2. giellan
  
• dárogiel seavagiella (láhttagiella)

Jos dus lea oahpahus ovtta bajábealde namuhuvvon oahppoplána mielde, muhto háliidat liikká vierisgiela, de galggat dan váldit diibmorámma olggobealde.

Vierisgiela sáhttá lohkat oktasašfágan guovtti dásis, I ja II.

Lei go dus vierisgiella vuođđoskuvllas? 

Dalle sáhtát válljet:

1. Joatkit II-dásis seammain vierisgielain, maid leat lohkan nuoraidceahkis - 113 diimmu Jo1-ceahkis ja 112 diimmu Jo2-ceahkis. Jos du skuvla dan fállá, sáhtát maid válljet vierisgiela III-dásis prográmmafágan Jo3-ceahkis, das leat 140 diimmu.
2. Lohkagoahtit ođđa vierisgiela I-dásis - 113 diimmu Jo1-ceahkis ja 112 diimmu Jo2-ceahkis. Jos du skuvla dan fállá, sáhtát lassin válljet vierisgiela II-dásis prográmmafágan Jo3-ceahkis. Das leat 140 diimmu. 

It sáhte nappo lohkagoahtit ođđasit seammá vierisgiela, maid leat lohkan nuoraidceahkis. Fuomáš maid ahte dus ii leat vuoigatvuohta joatkit vierisgielain, maid leat lohkan nuoraidceahkis, jos du skuvla ii dan fála.

It go leat lohkan vierisgiela vuođđoskuvllas?

Dalle fertet don

• lohkagoahtit vierisgiela I-dásis - 113 diimmu Jo1-ceahkis ja 112 diimmu Jo2-ceahkis
  
• joatkit II-dásis seamma vierisgiela, Jo3-ceahkis leat 140 diimmu

Dus, gii nuoraidceahkis válljejit vierisgiela sadjái eaŋgasgiela, dárogiela dahje sámegiela čiekŋuma, dahje vejolaččat bargoeallinfága, galgá de leat vierisgiella golbma jagi joatkkaskuvllas.  

Vierisgielat main ii oahpahuvvo

Jos máhtát vierisgiela bures dahje dus lea eará eatnigiella go dárogiella, ruoŧagiella dahje dánskkagiella, de sáhttá vierisgiella leat du vierisgiella I- dahje II-dásis. Jos dan gielas ii oahpahuvvo du skuvllas, fertet duođaštit iežat giellamáhtu privatistaeksámeniin, sihke njálmmálaččat ja čálalaččat. Dat guoská maid dutnje gii máhtát 

• sámegiela, muhto geas dat ii leat 1.- iige 2.-giellan
  
• seavagiela (láhttagiela), muhto geas dat ii leat 1. giellan
  
• suomagiela, muhto geas dat ii leat 2. giellan
  

Oasis muitaluvvo guđe gielain sáhttá váldit privatistaeksámena. Oaččut eanet dieđuid dan birra iežat skuvllas.