Prográmmafágat

Prográmmafágat leat mihtilmasat dan oahppoprográmmii ja prográmmasuorgái, maid válljet.

Oktasaš prográmmafágat

• Fidnofágalaš oahppoprográmmain leat prográmmafágat oktasaččat buot seammá prográmmasuorggi ohppiide.
• Valáštallanfágaid, dáidaga, designa ja arkitektuvrra, media ja gulahallama, musihka, dánsuma ja drámá oahppoprográmmas leat dihto prográmmafágat oktasaččat buot Jo1-, Jo2- ja Jo3-cehkiid ohppiide.
• Oahppospesialiserema oahppoprográmmas don válljet ieš guđe prográmmafágaide, mat gullet du prográmmasuorgái, don háliidat čiekŋut. Leat njuolggadusat dan hárrái, makkár fágaid fertet válljet ja makkár fágaid sáhttá ovttastahttit.

Válljenprográmmafágat

Studeremii ráhkkanahtti oahppoprográmmain leat várrejuvvon diimmut válljenprográmmafágaide. Dat leat prográmmafágat, mat gullet du prográmmasuorgái dahje eará studeremii ráhkkanahtti oahppoprográmmaide. Sáhtát válljet dihto njuolggadusaid vuođul. Guđege prográmmasuorggi fága- ja diibmojuogus almmuhuvvo galle diimmu sáhtát geavahit válljenprográmmafágaide.

Prográmmafágat mat vuođđuduvvet nubbi nubbái

Muhtin oahppoplánain daddjojuvvo, ahte prográmmafága vuođđun lea nubbi prográmmafága, omd. kemiija 2 vuođđun lea kemiija 1. Dat mearkkaša, ahte dus galgá leat fágalaš gelbbolašvuohta, maid olaha prográmmafága vuolit dásis, vai sáhtát lohkagoahtit fága bajit dásis.

Jos dus lea rektora árvvoštallama vuođul doarvái buorre gelbbolašvuohta, de sáhtát váldit prográmmafága bajit dásis, vaikko it leat váldán prográmmafága vuolit dásis. Čiekŋungáibádus gusto liikkáge, ja dat mearkkaša ahte don fertet Jo3-ceahkis joatkit guvttiin prográmmafágain, maid leat lohkan Jo2-ceahkis. Jos don ovdamearkka dihte logat dušše kemiija 2, itge kemiija 1, de don it leat čikŋon kemiijai.