Oahppofitnodagat, oahpahuskantuvra ja - miellahttofitnodagat

Oahppoprográmmaid (omd. ceahkkunfága) siidduin don oainnát makkár oahppofitnodagat ja oahppokantuvrrat fállet oahpahusa iešguđet oahppafágain. Muitte válljet iežat fylkka válljenlisttus vilbli.no bajit ravddas.  

Oahppofitnodat

Oahppofitnodat lea fitnodat, almmolaš etáhtta dahje ásahus, oahpahuskantuvra dahje oahpahusbiire, maid fylkkagielda lea dohkkehan fidnoohppiid/oahppokandidáhtaid váldimii. Dohkkeheapmi eaktuda ahte oahppofitnodat nagoda addit dutnje oahpahusa, mii fágii lea nannejuvvon oahppoplánas, ja das galgá leat fágalaččat gelbbolaš bargi (fágalaš jođiheaddji), geas lea ovddasvástádus oahpaheames. Oahpahus galgá nu guhkás go vejolaš heivehuvvot fidnooahppi dahje oahppokandidáhta attáldagaide, beroštumiide ja eavttuide.

Oahpahuskantuvra ja miellahttofitnodagat

Máŋga fitnodaga sáhttet ovttas ásahit oahpahuskantuvrra, mii buohtalastá fidnoohppiid/oahppokandidáhtaid ohppuiváldima ja oahpaheami. Juohke ovttaskas fitnodat mii gullá oahpahuskantuvrii galgá leat dohkkehuvvon oahppofitnodahkan. Oahppofitnodat šaddá dalle oahpahuskantuvrra miellahttofitnodahkan. Don dagat oahpposoahpamuša/oahpahussoahpamuša oahpahuskantuvrrain, mas lea juridihkalaš ovddasvástádus šiehtadusas. Oahpahusa sáhtát oažžut ovttas dahje máŋgga miellahttofitnodagas. Doppe gos oaččut oahpahusa, galgá leat fágalaš jođiheaddji, geas lea ovddasvástádus oahpahusas.

Oahpahusbiire

Fitnodagat, mat leat menddo unnit okto oahpahit fidnoohppiid/oahppokandidáhtaid, sáhttet ovttas ásahit oahpahusbiirre, mii ovttasbargá fidnoohppiid/oahppokandidáhtaid oahpaheami hárrái. Vai du oppalaš oahppoáigi govččašii buot oahppoplána osiid dahje oktagaslaš oahpahusplána osiid, de oaččut oahppoáiggis oahpahusa maiddái eará fitnodagain, mat gullet oahpahusbiirii. Buot biirre fitnodagat galget leat dohkkehuvvon oahppofitnodahkan ja dain galgá leat fágalaččat gelbbolaš olmmoš, geas lea ovddasvástádus du oahpahusas. Vaikko oaččutge oahpahusa máŋgga fitnodagas, de dagat soahpamuša dainna fitnodagain, mas lea váldoovddasvástádus du oahpahusas.