Árvvoštallama váidaleapmi

Oahppin sáhtát váidalit

• oppalašárvosáni
• mearrádusa leat attekeahttá oppalašárvosáni
• eksámenárvosániid

Privatistan sáhtát váidalit eksámenárvosániid.

Sáhtát váidalit ieš dahje fápmudit čálalaččat geannu eará váidalit iežat ovddas. Jos leat agivuloš, de lea du váhnemiin dahje fuolaheddjiin iehčanas váidalanvuoigatvuohta. Váidalus galgá álo leat čálalaš ja dat galgá vuolláičállot. Váidalusa galgá álo maid ákkastallat, earret jos lea sáhka čálalaš eksámenis.

Váidalusa meannudeami boađusin sáhttá árvosátni bissut seammán dahje dat sáhttá rievdaduvvot buoret dahje heajut guvlui. Dat mearkkaša ahte árvosátni sáhttá bajiduvvot dahje njeidojuvvot. Mearrádus galgá ákkastallojuvvot, muhto dat lea loahpalaš iige dan sáhte guoddalit.

Jos árvosátni rievdá váidalusa boađusin, de galgá čállojuvvot ođđa loahppaduođaštus dahje gelbbolašvuođaduođaštus. Boares duođaštusa galgá doaimmahit ruovttoluotta.

Don galggat iežat skuvllas oažžut dieđuid váidalanvuoigatvuođa, váidalanáigemeriid, váidaga sisdoalu, sáddenčujuhusa ja meannudeaddji birra. Buot mearrádusat váidaleami árvvoštallama birra leat oahpahuslága láhkaásahusa 10. kapihttalis.

Fuomáš ahte jahkebelleárvvoštallamiid, main addet lohkoárvosániid, ii sáhte váidalit iige rievdadit maŋŋá go dat leat addojuvvon.

Váidalanáigemearit

Váidalanáigemearri lea 10 beaivvi, go lea sáhka oppalašárvosáni ja eksámenárvosáni váidaleamis. Váidalanáigemearri lea dan beaivvi rájes, goas don ožžot dieđu mearrádusas dahje goas don livččet berren váldit čielgasa mearrádusas.

Váidalanáigemeari siste sáhtát maid gáibidit vuođuštusa dutnje addojuvvon árvosániide, dahje mearrádussii ahte árvosátni ii addojuvvo. Dat ii guoskka čálalaš eksámena árvosániide. Jos gáibidat vuođuštusa, gaskkalduvvo váidalanáigemearri. Dat joatkašuvvá ođđasit, go vuođuštus lea addojuvvon.

Oppalašárvosáni váidaleapmi

Váidalus mii guoská dihto fága oppalašárvosátnái, dahje mearrádussii ahte oppalašárvosátni ii addojuvvo, galgá sáddejuvvot skuvlii, muhto dan meannuda váidalaninstánsa, man fylkkadiggi lea fápmudan. Váidalaninstánsa sáhttá dušše árvvoštallat leago skuvla čuvvon árvosáni bidjama njuolggadusaid, mat leat fámus. Du váidalusa mielde sáddejuvvo du fágaoahpaheaddji cealkámuš dan hárrái mo árvosátni lea mearriduvvon, dahje manin árvosátni ii leat addojuvvon, ja rektora cealkámuš skuvlla áššemeannudeami birra. Don galggat oažžut kopiija cealkámušain.

Jos váidalaninstánsa ii mieđa du váidalussii, mearrádus lea loahpalaš. Jos dat miehtá du váidalussii, váidalaninstánsa čujuha guđe njuolggadusat dan mielas leat rihkkojuvvon dahje maid sáhttá navdit leat rihkkojuvvon, ja sádde ášši ruovttoluotta skuvlii. Don oaččut dieđu dan birra. Dan maŋŋá galgaba rektor ja fágaoahpaheaddji árvvoštallat ášši ođđasit. Rektor bidjá dalle loahpalaš árvosáni. Ođđa mearrádusa ii sáhte váidalit.

Jos váidalus guoská ortnega doallama ja láhttema árvosáni njeaidimii, de sáddejuvvo váidalus dalle maid skuvlii. Ovdal go dat sáddejuvvo viidáseappot váidalaninstánsii, de galgaba du gulahallanoahpaheaddji ja rektor čállit cealkámuša ee. dan hárrái makkár árvosánit dutnje leat ovdal addojuvvon, makkár vuođuin árvosátni lea njeidojuvvon, maid skuvla lea dahkan vai dilli buorránivččii ja mo skuvla lea meannudan ášši. Don galggat oažžut kopiija skuvlla cealkámušas. Váidalaninstánsa mearrida galgágo árvosáni rievdadit dutnje ovdun dahje unohisvuohtan. Dan mearrádusa ii sáhte váidalit.

Čálalaš eksámena árvosáni váidaleapmi

Čálalaš eksámena oktavuođas it sáhte gáibidit vuođuštusa dutnje addojuvvon árvosáni hárrái. Dus lea gal vuoigatvuohta oažžut kopiija iežat vástádusas, jos dáhtut. Don beasat maid diehtit makkár njuolggadusaid sensorat leat ožžon vástádusaid árvvoštallama veahkkin.

Jos mearridat váidalit, du vástádus sáddejuvvo váidalanlávdegoddái. Lávdegoddái muitaluvvo makkár árvosáni du vástádus oaččui dábálaš árvvoštallamis, muhto sidjiide ii muitaluvvo mainna ákkain don váidalat. Jos váidalanlávdegoddi oaivvilda ahte du árvosátni ii leat govttolaš eksámenbarggu ektui, de biddjojuvvo ođđa ja loahpalaš árvosátni. Ođđa árvosátni vuođuštuvvo, ja dat sáhttá leat dutnje ovdun dahje unohisvuohtan.

Njálmmálaš eksámena árvosáni váidaleapmi

Njálmmálaš eksámena oktavuođas sáhtát váidalanáigemeari siste gáibidit vuođuštusa árvosáni hárrái, muhto it sáhte gáibidit árvosáni rievdadeami. Don sáhtát váidalit dušše ahte leat dahkkojuvvon formála boasttuvuođat, mat leat váikkuhan eksámenbohtosii. Rektor dáhttu eksamináhtoris ja sensoris cealkámuša ja sádde daid oktan du váidalusain fylkkagieldda váidalaninstánsii. Don galggat oažžut kopiija cealkámušain.

Jos du váidalussii formála boasttuvuođaid hárrái mihtet, de ii lohkkojuvvo eksámenárvosátni. Sáhtát dalle válljet čađahit njálmmálaš eksámena ođđasit. Dalle oaččut nuppi sensora. Jos leat váidalan vuorbádanfága eksámena hárrái, de vuorbáduvvo fága ođđasit.

Eará eksámenbohtosiid váidaleapmi

Eará ii-čálalaš eksámeniin, earret njálmmálaš eksámeniin, main ii leat dokumentašuvdna, maid váidalanlávdegoddi sáhtášii árvvoštallat, sáhttá váidalit dušše formála boasttuvuođaid, mat vedjet leat váikkuhan eksámenbohtosii. Dakkár dáhpáhusain čuvvot váidalanvuogi, mii guoská njálmmálaš eksámeniidda.

Jos dakkár eksámena boađusin lea dokumentašuvdna, maid váidalanlávdegoddi sáhttá árvvoštallat fágalaččat, de čuvvot čálalaš eksámena váidalanvuogi.