Mo ohcamuš meannuduvvo?

Jos leat ohcan oahpposaji gaskkusteami, de du čujuhit oahppofitnodagaide, main leat oahpposajit daid fágain, maid vuođđun lea joatkkaskuvlla prográmmasuorgi, maid don leat čađahan. Fylkkagielda geahččala nu guhkás go vejolaš gaskkustit du dan fága oahppasajiide, masa leat ohcan. Don sáhtát dattetge čujuhuvvot fitnodagaide, main leat oahppasajit fágain, maidda it leat ohcan, muhto maidda dus lea gelbbolašvuohta, ja oahppofitnodagaide iežat ruovttugieldda dahje ruovttufylkka olggobealde. 

Fitnodagat válljejit ieža geasa fállet oahppasaji, ja sierra fylkkain leat sierra dagaldumit (rutiinnat) dan hárrái. Ohccit geat orrot heivemin oahpposadjái sáhttet bovdejuvvot jearahallamii. Danin lea hui mávssolaš ahte leat almmuhan rievttes čujuhusa ja mobiilanummira, ja ahte leat fáhtemis dan áigodagas, go sajit gaskkustuvvojit. Eanaš fylkkain sáhtát gitta suoidnemánu 1. beaivvi rádjai logget siidui vigo.no (logge siidui MinID vehkiin) ja rievdadit čujuhusa ja mobiilanummira.

Jos it váldde vuostá oahppofitnodaga fálaldaga, maid fylkkagielda lea dutnje gaskkustan, de dus ii leat vuoigatvuohta oažžut ođđa oahpposaji dahje skuvlaoahpahusfálaldaga seamma skuvlajagi.