Ambulansearbeidar (fagbrev)

Ambulansetenesta er den forlenga armen av spesialisthelsetenesta og har ansvar for akuttmedisin utanfor sjukehus. Sentrale arbeidsområde er

• utrykking til og transport av pasientar under alle vêr- og føreforhold
• undersøking, observasjon og identifikasjon av svikt i vitale organfunksjonar hos pasientar i uavklarte situasjonar
• prioritering mellom pasientar i akuttsituasjonar når fleire er skadde
• igangsetjing av akuttmedisinske behandlingstiltak, pleie og omsorg
• rapport og dokumentasjon av pasientopplysningar
• kontroll og vedlikehald av utrykkingskøyretøy og medisinsk utstyr

Ambulansearbeidaren må kunne planleggje, gjennomføre, vurdere og lære av eige og andre sitt arbeid. Faget stiller store krav til fagleg kunnskap, modenskap og sjølvstende. Sentralt for utviklinga av faget er evna til tverrfagleg samarbeid og erfaringsutveksling. Yrket krev god psykisk og fysisk helse og evne til å vere medmenneskeleg og vise empati.

For å kunne bruke yrkestittelen ambulansearbeidar må ein ha autorisasjon frå Helsedirektoratet.

Det blir stilt særskilte krav om kompetansebevis for utrykkingskøyretøy (førarkort klasse B). Vidare er det krav om god helse og god vandel.