Flystrukturmekanikar (fagbrev)

Ein flystrukturmekanikar utfører arbeidsoppgåver på luftfartøystrukturen, medrekna på venger og stabilisatorar. Sentrale arbeidsområde er

• planlegging og utføring av inspeksjon, feilsøking, service, justering, demontering, montering, sprekkontroll, reparasjon, låsing, sikring, modifikasjon, funksjonstesting, pakking, kontroll og konservering
• bruk og vedlikehald av nødvendig bakkeutstyr
• vurdering og dokumentasjon av eige og andre sitt arbeid og rapportering og oppfølging av feil og avvik
• samarbeid, rettleiing og læring
• val, bruk og vedlikehald av nødvendig verktøy og teste- og måleutstyr

Det blir lagt vekt på samarbeidsevner og gode kommunikasjonsevner. Du må kunne arbeide nøyaktig og planmessig. På grunn av dei strenge sikkerheitskrava i bransjen blir det òg lagt vekt på etikk, gode haldningar og innsikt i mellommenneskelege faktorar i den daglege opplæringa.

For å arbeide innanfor sikringssonene på norske flyplassar blir det stilt krav om utvida vandelsattest (uttømmande politiattest).