Elektro og datateknologi

Ein automatikar jobbar med montasje, drift og vedlikehald av automatiserte system. Det kan til dømes vere dører som opnar og lukkar seg automatisk, alarmsystem eller termostatsstyrte varmeomnar. Automatikaren skal kunne

• utføre installasjon, reparasjon, vedlikehald og feilsøking i industrielle og andre automatiserte lågspenningsanlegg
• kalibrere måleutstyr og signalomformarar, og setje opp nødvendig kalibreringsbevis
  
• reparere, skifte ut, justere og kontrollere alt materiell i automatiserte anlegg, mellom anna maskinell omarbeiding og samanføying
  
• montere og byggje om i automatiserte prosessar eller elektromekaniske system
• gjere nødvendige forandringar på styre- og forriglingssystem, og dokumentere dette
  
• setje i drift og funksjonsteste til dømes automatiserte prosessar, robotar, maskiner og anlegg
• optimalisere arbeidsprosessen og sjå potensial for betringar av prosesstyringa
• følgje tryggleiksforskriftene og dokumentasjonsrutinane i verksemda
  

Faget er tverrfagleg, og det er derfor viktig at du har god heilskapsforståing for prosessar og automatiseringssystem. Bedriftene treng medarbeidarar som forstår samanhengen frå idé til ferdig produkt. Det er òg viktig at du forstår og tek omsyn til behova til brukarane. Du må vere nøyaktig, ha godt handlag og vere interessert i teknologi.